Kalaallit Nunaanni Pinerluttunik Isumaginnittut

Pinerluttunik Isumaginnittut ukioq 2013-mi init isertitsiviit 155-it inissiaatigaat, Nuummi 66-it. Ilulissani 19-it, Sisimiuni 30-it, Tasiilami Aasiannilu 15-it Qaqortumilu 10-it. Taakkununnga ilaallutik Kangerlussuarmi utaqqiisaasumik inissiat 30-it, pilersaarut malillugu septembarimi 2014 matusussat. Nalinginnaasumik isertitsiviit taaneqartarput ”Pineqaatsissinneqarsimasunut Isertitsivik”, ukiunili kingullerni isertitsiviit pineqaatsissinneqarsimasunuinnaq inissaqartitsinngillat, pineqaatsissinneqarnissaminnullu tigummigallagaasunut amerliartortunuttaaq inissaqartitsillutik.

 

Taakkua saniatigut Sisimiuni nerisaqarluni isumagineqarlunilu inisimmavimmik 9-nik inissalimmik ingerlatsiveqarpoq, pineqaatsissinneqarnermik naammassinnilersunuunerusoq atorneqartumik.

Nuummi isertitsivik 2017-mi nutaamik isertitsivittaassaaq, ammasumik, matoqqasumik, naammassinnilersunullu immikkoortortalimmik.

Taamatuttaaq Pinerluttunik Isumaginnittut KiF-feqarfinnik (Pinerluuteqarsimasunik Isumaginnittoqarfik) nunami tamani siammarsimasunik immikkoortortaqarfeqarpoq. Immikkoortortaqarfiit pingaarnertut suliassaraat eqqartuussiveqarfiit atugassaannik inuk pillugu nassuiaasiornerit, nakkutigisaanissamut inuiaqatigiinnullu sullissinissamut eqqartuussissutinik naammassinninnissaq misiligutaasumillu iperagaasunik nakkutilliinissaq.

Kalaallit Nunaanni Pinerluttunik Isumaginnittut danskit naalagaaffiannit ingerlanneqarput ukioq 2010-miillu allaffissornikkut Nuummi Pisortaqarfimmit aqunneqarluni, Danmarkimi Inatsiseqarnermut Ministereqarfiup ataani inissisimasumit (Direktoratet for Kriminalforsorgen).

Nunatsinni pineqaatsissineqarsimasunut isertitsiviit nittartagaq www.kriminalforsorgen.gl iserfigalugu misissukkit.